طرائف وابتسامات

تقبلوا مني هده النكت التي هي من اختياري واتمنى ان تعجبكم

*كولو العدس

هادا واحد الراجل عرض على صحابو للغدا، وحط ليهوم طبسيل ديال العدس.
قال ليهوم: كولوا العدس راه مزيان فيه الحديد
تكاو عليه هاك بالاك، هاك بالاك، هاك بالاك، حتى فضاو معاه
قالوا ليه: زيدنا واحد طبسيل آخر
هاداك الراجل تعقدات ليه، ماكانش معول على جوج طباسل
مشى عمر ليهوم الطبسيل بالمسامر وقال لصحابو: كولو الحديد راه فيه العدس
ما نشوفوكش أزين
هادا واحد تابع وحدة، وبدا عليها: ما نشوفوكش أزين، حنا عندنا الديور، وعندنا المحلات، وعندنا الطوموبيلات...
دارت البنت وغير بانت ليه خايبة، وهو يقول ليها: ولكن خسارة، بعنا كلشي
*الخمسة وخمسة
مبوق سول صاحبو: شحال ف الساعة؟
قال ليه صاحبو: الخمسة وخمسة
قال ليه المبوق: ما تعرفش تقول عشرة؟

*المبوق والشارف
مبوق تضارب مع واحد الشارف وناض كعى عليه مزيان
الغد ليه مشى المبوق للمقبرة وعلق فيها التصويرة ديال الشارف مكتوب تحت منها: انتظروه قريبا

*فيها الفيتامين
هادا واحد خينا ديما كياكل الفلفلة الحارة كل نهار، و ف كل ماكلة
سولوه صحابو : مالك مع الفلفلة الحارة؟
قال ليهم: راه فيها الفيتامين أحححححح

*امتحان الرياضيات
واحد خرجوه من الامتحان ديال الرياضيات، علاش؟
لقاوه كاتب جدول الضرب مورا الكالكيلاتريس

*ضربني ونضربك
واحد مغربي قال لواحد الشينوي: ضربني و نضربك
قال ليه الشينوي واخا
جا الشينوي ضربو، وهو يسخف المغربي يومين
فاش فاق، سول الشينوي قال ليه: أشنو هاديك الضربة ضربتيني؟
قال ليه الشينوي: سميتها
Frappe coup
جات نوبة المغربي، ضرب الشينوي وهو يبقى ف كوما عام
ملي فاق، سول المغربي، قال ليه: أشنو هاديك الضربة ضربتيني؟
قال ليه المغربي: سميتها
K.M.J
قال ليه الشينوي: واشنو هي؟
جاوبو المغربي: كلامونيت ملوي في جورنال

*عرفتيني؟
واحد الموضف بغى يعيط للعساس يجيب ليه أتاي
وهو يغلط ف النمرة وصدق معيط على المدير ديالو
قال ليه: جيب ليا واحد أتاي للمكتب ديالي وطلق راسك أ الحمار
قال ليه المدير: واش عرفتي مع من كتهدر؟
قال ليه الموضف: لا
قال ليه المدير: أنا هو المدير أ الحيوان
قال ليه الموضف: ونتا عرفتي مع من كتهدر؟
قال ليه المدير: لا
قال ليه الموضف: إيوا الحمد لله
وهو يقطع

*علي وبراهيم
علي وبراهيم تشاركوا ف حانوت
واحد النهار، ناض علي علق على الحانوت پلاكة مكتوب عليها بالفرنسية
Alimentation générale
جاء براهيم قرا الپلاكة وكعا، وهو يبدلها ودار فيها
Brahimentation générale

*She has

أستاذ ديال الإنجليزية قال لواحد التلميد: دير ليا
She has
في جملة مفيدة
قال ليه التلميذ : شي هاز اللحم وشي هاز الهم

اتمنى ان تنال اعجابكم